Беш карра “Олтин тўп” соҳиби Криштиану Роналду Саудия Арабистони футбол лигасини “Ал-Ҳилол”га қарши учрашувда “Ал-Таавун” мухлисларининг хатти-ҳаракатларига нисбатан чора кўришга чақирди. У бу ҳақда “LiveMode TV”нинг “Instagram”даги пости остида изоҳ қолдирган.
Учрашув 12 сентябрь куни ўтказилиб, “Ал-Ҳилол”нинг 6:0 ҳисобидаги йирик ғалабаси билан якунланган.
Баҳс давомида “Ал-Таавун” мухлислари “Ал-Ҳилол” ярим ҳимоячиси Рубен Невешни унинг марҳум ватандоши Диогу Жотанинг номини тилга олиб, асабийлаштиришга уринган. Невеш эса бунга жавобан осмонга ишора қилган. Мазкур ишора “Худо ҳамма нарсани кўриб турибди” дея талқин қилинган.
Роналду бундай хатти-ҳаракатларга йўл қўйиб бўлмаслигини таъкидлаб, лига мухлисларга нисбатан қатъий чора кўриши кераклигини айтди.
“Лига бу ҳолат бўйича чора кўриши ва мухлисларни бундай хатти-ҳаракатлари учун жазолаши керак. Бу энди футбол эмас. Қабул қилиниши мумкин бўлган хатти-ҳаракатларнинг чегараси бўлиши керак. Бундай йўл тутган инсонлар ҳеч қачон стадионга киритилмаслиги лозим”, — деб ёзди Роналду.
Маълумот учун, Диогу Жота 2025 йил 3 июль куни Испанияда укаси Андре Силва билан бирга йўл-транспорт ҳодисасида ҳалок бўлган. Ўша вақтда Жота 28 ёшда эди.
Жота 2020 йилдан “Ливерпуль” сафида тўп тепган. У жамоа таркибида Англия Премьер-лигаси, Англия Кубоги ва Лига Кубогида ғолиб чиққан. Шунингдек, Португалия терма жамоаси билан икки марта Миллатлар лигаси ғолиби бўлган.
Футболчи фаолияти давомида “Атлетико Мадрид”, “Порту” ва “Вулверхэмптон Уондерерс” клубларида ҳам ўйнаган.
