Хоразм вилояти Қўшкўпир тумани қурилиш ва уй-жой коммунал хўжалиги бўлими бошлиғи фуқаронинг нотурар биносини турар жой тоифасига ўтказиб беришни ваъда қилиб, 1000 АҚШ доллари талаб қилган. У келишилган пулнинг бир қисмини олган вақтда ашёвий далиллар билан ушланган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, тезкор тадбир Департаментнинг Хоразм вилояти бошқармаси ҳамда бошқа ҳуқуқни муҳофаза қилувчи органлар ходимлари ҳамкорлигида ўтказилган.
Терговга қадар аниқланган ҳолатга кўра, бўлим бошлиғи Р. А. фуқаро Ж. П.нинг нотурар биносини турар жой сифатида расмийлаштириб беришини айтган. Бу масалани вилоят қурилиш ва уй-жой коммунал хўжалиги бош бошқармасида ишлайдиган танишлари орқали ҳал қилиб беришни ваъда қилган.
Бунинг эвазига у фуқародан 1000 АҚШ доллари талаб қилган. Р. А. келишилган маблағнинг 700 доллари ва 3,6 миллион сўмини олган вақтда қўлга олинган.
Мазкур ҳолат юзасидан Р. А.га нисбатан Жиноят кодексининг 168-моддаси (фирибгарлик) ҳамда 28, 211-моддалари (пора беришга далолат қилиш) билан жиноят иши қўзғатилган.
