Беш карра “Олтин тўп” соҳиби, португалиялик ҳужумчи Криштиану Роналду ўзи ҳозирда тўп сураётган Саудия Арабистонининг “Ал-Наср” клубини сотиб олишни режалаштирмоқда. Бу ҳақда “DAZN Portugal” хабар берди.
Қайд этилишича, Роналду яна тўрт нафар инвестор билан биргаликда клубни сотиб олиш бўйича таклиф тайёрламоқда. Ҳар бир инвестор камида 92 миллион евро миқдорида маблағ киритиши кутилмоқда.
41 ёшли Роналду фаолияти давомида беш марта УЕФА Чемпионлар лигаси, бир марта Европа чемпионати ва икки марта УЕФА Миллатлар лигасида ғолиб чиққан.
Португалиялик футболчи терма жамоалар, Европа чемпионатлари, Чемпионлар лигаси ҳамда клублар ўртасидаги жаҳон чемпионати тарихида энг кўп гол урган футболчи ҳисобланади.
Маълумот учун, Роналду 2022 йил декабрь ойидан буён “Ал-Наср” сафида тўп суриб келмоқда. У фаолияти давомида шунингдек, “Спортинг”, “Манчестер Юнайтед”, “Реал Мадрид” ва “Ювентус” клубларида ҳам ўйнаган.
