“Миллий тикланиш” демократик партияси раиси, Олий Мажлис Қонунчилик палатаси депутати Алишер Қодиров Маданий мерос агентлигининг Бобур кўчаси, 7-уйдаги бино юзасидан билдирган муносабатига жавоб берди. У агентликка Сармишсой, Шоҳизинда ва Миздаҳқон каби маданий мерос объектлари бўйича бир қатор саволларни такрор йўллади.
Аввалроқ, 15 сентябрь куни Олий Мажлис Қонунчилик палатасининг навбатдаги мажлисида Қодиров Тошкент шаҳри, Бобур кўчаси, 7-уйдаги бинога маданий мерос объекти сифатида муносабат билдирилишига эътироз қилган эди. 16 сентябрь куни эса Маданий мерос агентлиги депутатнинг фикрларига расмий муносабат билдирди.
Шундан сўнг Қодиров ўзининг “Телеграм” каналида агентлик муносабатига жавобан, идора парламентдаги бюджет ҳисоботи вақтида депутатларнинг саволларига жавоб бериш ўрнига ижтимоий тармоқлар орқали муносабат билдирганини таъкидлади.
“Партия жавоб муносабати қилмайди, албатта, лекин саволларимизга жавоб олиш учун парламент сўрови ёки эшитуви ваколатимиздан фойдаланишга ҳаракат қилиб кўрамиз”, деб ёзди депутат.
Қодировнинг қайд этишича, у Сармишсой, Шоҳизинда ва Миздаҳқон каби объектлар бўйича билдирган танқид ва таклифларига агентликдан жавоб ололмаган.
У Сармишсойда ноёб маданий мерос объектига миллиардлаб маблағ сарфлангани ҳолда, гектарлаб ҳудуддаги очиқ музей қаровсиз ва ташландиқ ҳолатда қолаётганига изоҳ сўраган.
Шунингдек, депутат Шоҳизиндага олиб борувчи автомобиль йўли ёдгорликка жиддий зарар етказаётгани, уни таъмирлаш учун маблағ йўқлиги ва бу масалада маҳаллий ҳокимиятга нисбатан суд жараёни олиб борилмаётганини ҳам савол остига қўйган.
Қодиров Бухорода сақланаётган Қуръоннинг энг қадимий нусхаларидан бири Аркда талабга жавоб бермайдиган омборда сақланаётгани ҳақида ҳам савол берган. Шунингдек, Довон давлати билан боғлиқ ноёб мерос объектлари жойлашган ҳудудларнинг деҳқончилик учун бериб юборилгани юзасидан изоҳ сўраган.
“Нега агентлик совет давридаги меросга қилаётган меҳрибончилигини минг йиллик миллий маданиятимиз ва меросимизга нисбатан қилмаяпти? Ўнлаб саволлар бор, ўтган йилдан бери жавоб олишга ҳаракат қиляпмиз”, дея ёзган Қодиров.
Депутат ўз эътирози муайян шахснинг миллатига эмас, балки маданий мерос объектларига эътибор ва маблағларнинг қандай тақсимланаётганига қаратилганини таъкидлаган.
“Биз ўрнини тўлдириб бўлмайдиган маданий меросимиз бир чеккада қолиб кетиб, бир рус рассоми, ўзбек адабиётшуноси, украин архитектори ёки бирон бошқа қадрли эканлигига шубҳамиз бўлмаган ватандошимизни, ким бўлишидан қатъи назар, квартирасини асрашга кўпроқ эътибор қаратилаётганига эътироз билдиряпмиз”, деган у.
Қодиров Маданий мерос агентлигининг парламентдаги ҳисобот бериш тартиби юзасидан ҳам савол берган.
“Мутахассис эмасмиз, балки хато ўйлаётгандирмиз? Нега парламентда ҳисобот бериш учун ҳукумат келади-ю, агентлик жўяли жавоблар беролмасдан тармоқлардан туриб муносабат билдиради?”, дея ёзган депутат.
У мазкур масала бўйича парламентдаги ваколатларидан фойдаланишини билдирган.
“Бу депутат сифатида менинг фикрим, партия раиси сифатида агентлик ҳисоботидан кейин парламентда сўз оламан”, деган Алишер Қодиров.
