АҚШда 9 ёшли бола ота-онасидан яширинча отасининг корпоратив банк картасидан фойдаланиб, YouTube каналидаги видеоларини реклама қилиш учун 118 минг доллар сарфлаб юборди. Бу ҳақда “pravilamag” хабар берди.
Қайд этилишича, Майк исмли мактаб ўқувчиси Minecraft ва Roblox ўйинлари ҳақидаги видеоларни YouTube’га жойлаб келган. Унинг Mighty Mike Plays каналида 35 мингдан ортиқ обуначи бор.
Дастлаб отаси Дэйв ўғлини қўллаб-қувватлаш мақсадида унга 20 долларлик реклама кампаниясини ташкил қилиб берган. Кейинчалик Майк реклама воситаларидан мустақил фойдаланишни ўрганган.
Шундан сўнг бола реклама харажатлари учун отасининг Google аккаунтига уланган корпоратив банк картасидан фойдалана бошлаган.
Ҳодиса Дэйв ишхонада корпоратив карта бўйича масъуллар билан суҳбатга чақирилганида фош бўлган. У картасидан 100 минг доллардан ортиқ маблағ ечилганини билиб, пуллар ўғлининг YouTube канали рекламасига сарфланганини аниқлаган.
Дэйвнинг айтишича, 9 ёшли бола бундай катта миқдордаги харажатларнинг аҳамиятини тўлиқ англамаган. У молиявий маълумотларга чекловсиз кириш имконини бергани учун жавобгарликни ўз зиммасига олган.
Ҳозирда оила сақланган тўлов маълумотларини ўчириш, харажатларга лимит ўрнатиш ва ота-она назоратини кучайтиришни режалаштирмоқда. Муҳокамалар якунига қадар боланинг YouTube канали фаолияти ҳам тўхтатилган.
