19 сентябрь куни кечқурун Тошкент осмонида ортидан узун из қолдирган ёрқин жисм кузатилди. Унинг видеолари ижтимоий тармоқларда тарқалди. Фанлар академияси Астрономия институти мутахассислари ҳодиса юзасидан дастлабки хулосаларини билдирди.
Фото ва видеолар таҳлилига кўра, жисмнинг ташқи кўриниши, ҳаракати ва қолдирган изи метеор ёки болидга хос эмас. Мутахассислар унинг ракета қисми бўлиши эҳтимоли юқори эканини айтган.
Астрономия институти катта илмий ходими Камолиддин Эргашевнинг таъкидлашича, энг эҳтимолий версия — Хитойнинг "Тайюан" космодромидан учирилган Long March-2D ташувчи ракетасининг ишлаб бўлинган биринчи босқичи. Мазкур ракета PIESAT-2 сериясидаги тўртта сунъий йўлдошни орбитага олиб чиққан.
Дастлабки ҳисоб-китоблар ракета учирилган вақт, унинг орбитаси ҳамда Тошкентда ҳодиса кузатилган вақт ва йўналиш ўртасида мослик борлигини кўрсатган.
Бироқ олимлар жисм айнан шу ракета қисми эканини ҳозирча қатъий тасдиқламаган. Ҳодисани тўлиқ идентификация қилиш учун зарур орбитал маълумотлар халқаро каталогларда ҳали мавжуд эмас.
