Дубайдан Тель-Авивга учиб кетаётган Flydubai самолётида фавқулодда ҳолат юз берди. Дастлаб учувчилар ўртасида жанжал чиққанини айтилган бўлса, кейинроқ иккинчи учувчи экипаж командирига пичоқ билан ҳужум қилгани ҳақида маълумотлар тарқалди. Исроил расмийлари ҳодисанинг эҳтимолий теракт бўлган версиясини ҳам текширмоқда.
Маълумотларга кўра, самолёт учиши давомида учувчилар кабинасидан шовқин эшитилган. Кўп ўтмай кабина эшиги очилиб, йўловчилар қонга беланган учувчини кўрган.
Йўловчилардан бири Мириамнинг i24NEWS’га айтишича, иккинчи учувчи экипаж командирига бир неча бор пичоқ урган. Бортдаги шифокор ва ҳамшира жароҳатланган учувчига биринчи ёрдам кўрсатган.
Шундан сўнг бир неча йўловчи ва экипаж аъзолари кабинага кириб, ҳужум қилган шахсни зарарсизлантирган. Ҳодиса вақтида бортдаги хавфсизлик хизмати ходими ҳам вазиятни назоратга олишда иштирок этган бўлиши мумкин.
Самолёт ичида тасвирга олинган видеода қонга беланган икки эркакка тиббий ёрдам кўрсатилаётгани акс этган. The Insider маълумотларига кўра, улардан бирининг формасидаги учта тасма унинг иккинчи учувчи эканини кўрсатган.
Самолётни қулатишга уриниш бўлганми?
Исроил Мудофаа вазирлиги ва махсус хизматларининг дастлабки таҳлилига кўра, иккинчи учувчи самолёт бошқарувини эгаллаб, уни ҳалокатга учратишга уринган бўлиши мумкин.
Ynet маълумотига кўра, Исроил расмийлари ҳодисани эҳтимолий теракт сифатида ҳам текширмоқда. Ҳозирча воқеа ўз жонига қасд қилишга уриниш бўлганми ёки теракт мақсадида амалга оширилганми — аниқ эмас.
Дастлаб учувчилар Россия ва Украина фуқаролари экани ҳақида хабарлар тарқалган. Кейинчалик бу маълумот тасдиқланмаган. Ynet ва Walla маълумотларига кўра, экипаж командири БАА фуқароси, унга ҳужум қилган иккинчи учувчи эса Уммон фуқароси бўлган.
Самолётни бошқа учувчилар қўндирган
Ҳодисадан сўнг самолётни бошқариш масаласи юзага келган. Walla маълумотига кўра, бортда хизмат жадвали асосида Тель-Авивга йўл олган бошқа Flydubai учувчилари ҳам бўлган.
Айнан улар самолёт бошқарувини ўз қўлига олиб, уни Саудия Арабистонининг Табук аэропортига хавфсиз қўндирган.
Ҳодиса вақтида бортдаги айрим йўловчилар учувчилардан бири иккинчисига ҳужум қилгани ва уни ўлдиришга уринганини айтган. Айрим йўловчилар воқеаларни тасвирга олишган.
Бортда 174 нафар йўловчи бўлган
Сўнгги маълумотларга кўра, самолёт бортида 174 нафар йўловчи, жумладан 27 нафар бола бўлган. Уларнинг қарийб 150 нафари Исроил фуқаролари эди.
Йўловчилардан ҳеч бири жисмонан жабрланмаган. Бироқ бортдан тарқалган видеоларда йўловчиларнинг ваҳимага тушгани ва қичқириқлар эшитилади.
Табук аэропортига қўнишдан сўнг Flydubai йўловчиларни Тель-Авивга етказиш учун захира самолётини юборган.
Шунингдек, Исроил бош вазири Биньямин Нетаньяху ва мудофаа вазири Исроил Кац мамлакат Мудофаа кучларига Саудия Арабистонига самолётлар жўнатиб, йўловчиларни Исроилга олиб келишни топширган.
Эслатиб ўтамиз, 30 сентябрь куни Дубайдан Тель-Авивга учаётган Flydubai самолёти аввал 7700 фавқулодда сигналини берган. Кейинчалик экипаж 7500 кодини — самолётга ноқонуний аралашув ёки уни олиб қочишга уриниш ҳолатини англатувчи сигнални узатган.
Шундан сўнг Исроил ҳарбий-ҳаво кучларининг қирувчи самолётлари ҳавога кўтарилиб, йўловчи самолёти томон йўналтирилган.
