Туркиялик машҳур хонанда Гуллунинг ўлими бўйича судда унинг қизи Туғян Улкем Гюлтернинг дугонаси Султон Нурўғли воқеа юзасидан кўрсатма берди. У Туғяннинг онасини деразадан улоқтирганини кўрганини айтди. Прокурор Гюлтерга оғирлаштирилган умрбод қамоқ жазоси тайинлашни сўради. Бу ҳақда “Sözcü” хабар берди.
“Гуллу” номи билан танилган 52 ёшли Гул Тут 2025 йил 26 сентябрь куни Ялова вилояти Чинаржик туманидаги уйининг олтинчи қаватидан йиқилиб, вафот этган. Ҳозирда унинг ўлими юзасидан жиноят иши доирасида қизи Туғян Улкем Гюлтер ҳибсда сақланмоқда.
Судда илк бор кўрсатма берган Гюлтер ўзига қўйилган айбловларни рад этди. Унинг айтишича, воқеа содир бўлган куни дугонаси Султон Нурўғли билан бирга уйда бўлган. Улар фильм томоша қилиб, вақт ўтказган.
Гюлтернинг сўзларига кўра, онаси хонага кириб, улар билан бирга ўйнаган. Кейин у орқаси билан турган пайтда “бам” деган овозни эшитган.
“Орқамга қарасам, онам йиқилиб тушган экан. Султонга “югур” дедим ва бирга пастга тушдик. Мен орқам билан турган эдим, онам йиқилиб тушди. Унга бирор нарса текканини кўрмадим”, деган Гюлтер.
Бироқ унинг дугонаси судда воқеанинг бутунлай бошқача талқинини айтган.
Султон Нурўғлининг билдиришича, улар хонада кўнгилхушлик қилиб ўтирган пайтда Гуллу хонага кирган. Ўша вақтда Нурўғли аввал бошидан ўтган бахтсиз ҳодиса оқибатида қолган жароҳатларига қараш учун ойнага ўгирилган.
“Орқамга ўгирилганимда, Туғяннинг онасини деразадан улоқтирганини кўрдим. Кейин у менга “югур”, деди”, деган Нурўғли.
Нурўғли, шунингдек, дастлаб воқеа бўйича бошқача кўрсатма берганини айтган. У бунга қўрқув ва босим сабаб бўлганини билдирган. Кейинчалик адвокатига ҳақиқатни айтиш нияти борлигини айтган ва ҳибсга олинганидан сўнг воқеа бўйича ўз кўрганларини баён қилган.
Унинг таъкидлашича, дафн маросими куни Гюлтер унга “Мени куйдирсанг, мен ҳам сени куйдираман”, деган.
Гюлтер эса дугонаси босим остида бундай кўрсатма берганини иддао қилган.
“Султон босим остида эди, шунинг учун бундай кўрсатма берган. Мен ҳам полиция бўлимида катта босим кўрдим”, деган у.
Суд мажлисида прокурор Туғян Улкем Гюлтерга оғирлаштирилган умрбод қамоқ жазоси тайинлашни ҳамда уни ҳибсда сақлашни давом эттиришни сўраган.
Суд ҳайъати Гюлтернинг ҳибсда қолишини давом эттиришга қарор қилган. Кейинги суд мажлиси 9 октябрь куни соат 09:00 га белгиланган.
