Исроил Ҳарбий-ҳаво кучлари Дубайдан Тель-Авивга учиб келаётган Flydubai самолётини уриб туширишга тайёрланган. Бунга бортдаги учувчилар ўртасида юз берган жанжал ва самолётнинг кескин баландлик йўқотиши сабаб бўлган. Бу ҳақда “CBS News” хабар берди.
Қайд этилишича, 30 сентябрь куни Flydubai’нинг FZ1073 рейси Дубайдан Тель-Авивга учган. Парвоз вақтида иккинчи учувчи капитан Смит Маччхарга ҳужум қилган.
Ҳодиса оқибатида самолёт қисқа вақт ичида минглаб фут баландликни йўқотган. Экипаж билан алоқа ўрнатишнинг иложи бўлмаган.
Шундан сўнг Исроил Ҳарбий-ҳаво кучлари фавқулодда протоколни ишга туширган. Қирувчи самолётлар ҳавога кўтарилган ва ҳаво кемаси йўналиши кузатилган.
Бироқ Flydubai самолёти Исроилдан узоқлашиб, Саудия Арабистони томон бурилган. Шундан кейин Исроил қирувчилари ортга чақирилган.
Самолёт Саудия Арабистонининг Табук шаҳридаги аэропортга фавқулодда қўнган.
Маълум қилинишича, капитан Смит Маччхар ҳужумдан кейин кабина эшигини очишга муваффақ бўлган. Шундан сўнг йўловчилар ва экипаж аъзолари иккинчи учувчини зарарсизлантирган.
Самолёт бортида бўлган навбатдан ташқари икки учувчи ҳам бошқарувни ўз қўлига олган. Улар ҳаво кемасини Табук аэропортига хавфсиз қўндирган.
Исроил томонининг протоколига кўра, агар самолёт олиб қочилган деб баҳоланса, экипаж билан алоқа ўрнатилмаса ва ҳаво кемаси мамлакатга хавф туғдиришда давом этса, уни уриб тушириш масаласи кўриб чиқилиши мумкин. Бундай қарорни эса фақат Бош вазир қабул қилиши мумкин.
Тергов маълумотларига кўра, иккинчи учувчи самолётни Тель-Авивдаги Бен-Гурион аэропортига қулатишни режалаштирган бўлиши мумкин. Ҳозирча унинг ҳаракатлари сабаби ва бошқа шахслар билан алоқаси бўйича тергов давом этмоқда.
Маълумот учун, Flydubai’нинг FZ1073 рейси Boeing 737 MAX 8 самолётида амалга оширилган. Ҳодиса вақтида самолётда 170 дан ортиқ йўловчи ва экипаж аъзолари бўлган. Барча йўловчилар тирик қолган.
