Хорижда ўзбек миллий таомлари ресторанини очган ёки очишни режалаштираётган тадбиркорлар сарф-харажатларининг 50 фоизигача бўлган қисмини давлат субсидияси сифатида олиши мумкин. Бунинг учун улар белгиланган тартибда ариза топшириши лозим.
Ягона интерактив давлат хизматлари порталининг Telegram-каналида маълум қилинишича, мазкур хизмат Туризм қўмитаси томонидан бепул кўрсатилади. Ундан Ўзбекистонда рўйхатдан ўтган тадбиркорлик субъектлари фойдаланиши мумкин.
Субсидия олиш учун аризага хорижда рўйхатдан ўтказилган ресторан ва бино ҳуқуқини тасдиқловчи ҳужжатлар, шунингдек, санитария ҳамда ёнғин хавфсизлиги талабларига мувофиқликни тасдиқловчи маълумотлар илова қилиниши керак.
Бундан ташқари, тадбиркорлар амалга оширилган харажатлар ва Ўзбекистондан маҳсулот етказиб берилганини тасдиқловчи ҳужжатларни, рестораннинг ички ва ташқи кўриниши акс этган фотосуратларни ҳам тақдим этиши лозим. Зарур ҳолларда ҳужжатларнинг расмий таржимаси ҳам талаб қилинади.
Аризалар 18 иш куни ичида кўриб чиқилади. Субсидия ажратиш бўйича ижобий қарор қабул қилинган тақдирда, маблағлар 7 иш куни ичида тадбиркорнинг банк ҳисобварағига ўтказилади. Ҳужжатларда камчиликлар аниқланса, уларни бартараф этиб, аризани қайта топшириш мумкин.
Тадбиркорлар субсидия олиш учун аризани Ягона интерактив давлат хизматлари портали — my.gov.uz орқали юбориши мумкин.
