Ўзбекистонда банклар мижознинг розилигисиз кредит қарздорлигини сўндириш учун унинг банк карталаридан маблағ ундирганидан кейин ҳисобида камида 680 минг сўм қолдириши шарт бўлади. Бу Марказий банкнинг 9 октябрь куни қабул қилган қарорида белгиланган.
Қарорга мувофиқ, мижознинг розилигисиз унинг банк карталаридаги маблағлардан кредит ёки кафиллик бўйича қарздорликни ундиришда янги талабга амал қилиниши керак. Унга кўра, ундирувдан кейин мижознинг ҳисобида меҳнатга ҳақ тўлашнинг энг кам миқдорининг камида ярмига тенг маблағ сақланиб қолиши лозим.
Ҳозирда Ўзбекистонда меҳнатга ҳақ тўлашнинг энг кам миқдори 1 миллион 360 минг сўмни ташкил этади. Шундан келиб чиқиб, қарздорлик ундирилганидан кейин мижознинг банк карталарида камида 680 минг сўм қолиши керак.
Янги тартиб 2027 йил 10 январдан кучга киради.
