Буюк Британия 8 октябрь куни Қирғизистонда рўйхатдан ўтган учта компания ва улардан бирининг раҳбари Улан Букабаевга нисбатан санкциялар жорий этди. Чекловлар Россияга қарши санкциялар доирасида киритилган. Бу ҳақда “Economist.kg” хабар берди.
Санкциялар “Процессинг КейДжи” акциядорлик жамияти, “ТокенСпот” ёпиқ акциядорлик жамияти, “Цунами Пейментс” масъулияти чекланган жамияти ҳамда “Процессинг КейДжи” раҳбари Улан Букабаевга нисбатан қўлланилган.
Чекловлар компаниялар активларини музлатиш, улар билан боғлиқ айрим молиявий операцияларни амалга ошириш ва муайян хизматларни кўрсатишни тақиқлашни назарда тутади. Шунингдек, Британия банкларига ушбу тузилмалар билан вакиллик муносабатларини ўрнатиш, молиявий ташкилотларга эса уларнинг манзилига, улардан ёки улар орқали тўловларни амалга ошириш тақиқланган.
Британия томони ушбу компаниялар фаолияти Россия расмийларига наф келтириши ёки уларни қўллаб-қувватлаши мумкин, деб ҳисоблайди.
Санкциялар рўйхатидаги асосий компаниялардан бири — “Процессинг КейДжи”. Британия расмийлари Қирғизистон Молия вазирлигини мазкур компаниянинг бош ташкилоти сифатида кўрсатган. “Economist.kg” маълумотига кўра, 2025 йил июль ойида вазирлик компаниянинг ягона акциядорига айланган.
“Процессинг КейДжи” Қирғизистон ҳукумати томонидан таъминланган векселлар асосида халқаро савдо операцияларига хизмат кўрсатишга мўлжалланган VexPay тўлов платформасини ривожлантирмоқда. Компания ушбу векселларни чиқариш, ўтказиш ва улар бўйича ҳисоб-китобларни амалга ошириш билан шуғулланади.
2025 йил ёзида Улан Букабаев янги процессинг маркази савдо ва молиявий операцияларга хизмат кўрсатишини, шунингдек, халқаро молиявий хабарлар алмашинуви тизими — SWIFT’га муқобил бўлишини айтган.
Аввалроқ “Financial Times” нашри Россиянинг A7 тўлов тармоғи вакиллари 2025 йил апрель ойида VexPay платформасини Қирғизистон расмийларига SWIFT’нинг муқобили сифатида тақдим этгани ҳақида хабар берган. Бироқ Қирғизистон Молия вазирлиги ва “Процессинг КейДжи” платформа ташқи томондан назорат қилинаётгани ҳақидаги даъволарни рад этган.
Улан Букабаевга нисбатан шахсий чекловлар ҳам жорий қилинган. Жумладан, унинг Британияга кириши тақиқланган ва раҳбарлик лавозимларини эгаллаш имконияти чекланган.
Санкцияга учраган яна бир компания — “ТокенСпот” Бишкекда рўйхатдан ўтган криптовалюта биржаси бўлиб, асосан Россия ва бошқа Мустақил Давлатлар Ҳамдўстлиги мамлакатларидаги фойдаланувчиларга мўлжалланган. Платформа орқали криптовалюталарни рубль ва бошқа валюталарга сотиб олиш ва сотиш, маблағларни банк орқали киритиш ва ечиб олиш, шунингдек, спот ҳамда фьючерс бозорларида савдо қилиш мумкин.
