Трамп Зеленский ўрнига янги Президент сайлаш вақти келганини айтди
АҚШ Президенти Дональд Трамп Украина Президенти Владимир Зеленскийни Россиянинг нефтьни қайта ишлаш заводларига ҳужумларни давом эттириш орқали жаҳон бозорида дизель ёнилғиси таъминотига зарар етказаётганликда айблади. Унинг фикрича, Украинада янги Президент сайлаш вақти келган. Бу ҳақда “Reuters” хабар берди.
Трамп 10 октябрь куни Оқ уйда журналистлар билан суҳбатда Украина раҳбариятини танқид қилган. Унинг айтишича, Зеленский урушни тугатиш бўйича келишувга эришиш имкониятига эга бўлган, бироқ ундан фойдаланмаган.
“Менимча, Украина учун янги Президент сайлаш вақти келди”, деган Трамп.
АҚШ раҳбари Зеленскийни Россиянинг нефтьни қайта ишлаш заводларига зарбалар бериш орқали жаҳон бозорида дизель ёнилғиси таъминотига муаммо туғдираётганликда айблаган. Трампнинг таъкидлашича, Россия жаҳондаги дизель ёнилғиси таъминотининг катта қисмини таъминлайди. Шу боис Украина ҳужумлари ёнилғи етказиб беришга, жумладан, АҚШдаги фермерлар ва чорвадорларга ҳам таъсир қилиши мумкин.
“Мен унга: «Хоҳлаганингни қил. Фақат нефтьни қайта ишлаш заводларига зарба берма. Нишонлар етарли. Заводларга ҳужум қилма», дедим. Лекин у бориб, яна зарба берди. У буни бас қилгани маъқул”, деган АҚШ Президенти.
Трамп Украинадаги янги раҳбар Россия билан келишувга эриша олиши кераклигини ҳам таъкидлаган.
“Менимча, улар келишувга эриша оладиган янги раҳбар сайлашлари керак. Чунки у кўплаб келишувларга эришиши мумкин эди, аммо негадир буни ҳеч қачон қилмайди”, деган у.
Ўз навбатида, Зеленский Трампнинг Россия билан дизель ёнилғиси масаласидаги келишувини танқид қилган. Украина раҳбарининг фикрича, Россияга нисбатан санкцияларни юмшатиш Москвага урушни давом эттириш учун қўшимча имконият бериши мумкин.
Эслатиб ўтамиз, Россия ҳукумати 10 октябрь куни дизель ёнилғиси экспортига қўйилган тақиқ қисман бекор қилинганини маълум қилган эди. Трампнинг Россия Президенти Владимир Путин билан келишуви ҳам дизель ёнилғиси етказиб бериш ва унга нисбатан чекловларни юмшатиш билан боғлиқ. Зеленский ушбу қарорни кескин танқид қилиб, уни “очиқ заифлик белгиси” деб атаган эди.
