Қорақалпоғистоннинг “Арал” футбол клуби муддатидан аввал Ўзбекистон Суперлигасининг 2027 йилги мавсумида иштирок этиш ҳуқуқини қўлга киритди. Нукус жамоаси сўнгги бор 25 йил аввал мамлакатнинг олий дивизионида иштирок этган.
Про лиганинг 23-турида “Арал” Қорақалпоғистон давлат университетининг “ҚМУ Жайхун” жамоасига қарши майдонга тушди. Учрашувда нукусликлар 2:0 ҳисобида ғалаба қозониб, Суперлига йўлланмасини расмийлаштирди.
Баҳснинг 17-дақиқасида Асадбек Мустафоқулов тўпни ўз дарвозасига киритиб қўйди ва “Арал” ҳисобда олдинга чиқди. Учрашув якунига етти дақиқа қолганида Марк Краснов рақиб дарвозасини ишғол этиб, жамоасининг ғалабасини мустаҳкамлади.
“Арал” учун жорий мавсум муваффақиятли кечмоқда. Жамоа Про лигада ўтказган 23 та учрашувнинг фақат биттасида мағлубиятга учраган. Барқарор натижалар эвазига нукусликлар мавсум якунланишидан бир неча тур аввал Суперлигага чиқиш вазифасини бажарди.
Шу тариқа, “Арал” 25 йиллик танаффусдан кейин яна Ўзбекистон футболининг энг юқори дивизионида иштирок этади.
