Папуа-Янги Гвинея шаҳридаги “Буимо” қамоқхонасидан оммавий тарзда 77 нафар маҳбус қочди, деб хабар берди Vesti.ru нашри.
Иссиқ изидан 3 нафар қочоқ қўлга олинди, 17 нафари қўриқчилар томонидан отиб ўлдирилди. 57 нафар жиноятчини қўлга олишнинг иложи бўлмади, улар очиқда қолди.
Маҳбуслар 12 май куни тонгда қамоқхонани тарк этишган. Полиция берган маълумотга кўра, маҳбусларнинг барчаси ўта оғир жиноятни содир этган жиноятчилар бўлиб, фуқаролар ҳаётига жиддий хавф солади.
Полиция уларни ўз хоҳишлари билан орқага қайтишга, таслим бўлишга чақирди. Мамлакатдаги қамоқхоналар маҳбуслар билан тўлиб-тошган. “Буимо” қамоқхонаси 400 нафар маҳбусга мўлжалланганига қарамай, у ерда 800 нафар маҳбус жазони ўтаяпти. 2016 йилда ҳам “Буимо” қамоқхонасидан 80 нафар маҳбус қочган эди. Ўшанда уларнинг 11 нафари отиб ўлдирилган, қолганини тутишнинг иложи бўлмаган эди. 2015 йилда ҳам мазкур қамоқхонадан 50 нафар маҳбус қочишга муваффақ бўлган.
