2017 йилнинг 23 май куни Ўзбекистон Республикаси Президенти Шавкат Мирзиёев Буюк Британия ва Шимолий Ирландия Бирлашган Қироллиги Бош вазири Тереза Мей номига Манчестер шаҳридаги террорчилик ҳаракати оқибатида кўплаб инсонлар ҳалок бўлгани муносабати билан ҳамдардлик билдириб мактуб йўллади.
Давлатимиз раҳбари ўз мактубида ҳалок бўлганларнинг оила аъзолари ва яқинларига самимий ҳамдарлик ва далда сўзларини етказишни сўради, барча жароҳат олганларга эса тез орада соғайишни тилади.
Эслатиб ўтамиз, 22 май куни “Манчестер Арена” стадионида концерт бўлаётган вақтда кучли портлаш содир бўлди.
Содир бўлган теракт 22 кишининг ҳаётига зомин бўлди. Полиция берган маълумотга кўра, қурбон бўлганлар орасида болалар ҳам бор. Яраланган 59 нафар одам турли тан жароҳати билан касалхонага ётқизилди.
