Ҳужжатга кўра, мамлакатда ижтимоий ҳимояга муҳтож аҳолини қўллаб-қувватлаш, оғир хасталикка чалинган беморларни даволаш ҳамда хайрия тадбирларини кенгайтириш бўйича қатор чоралар амалга оширилади.
Қарор билан:
— оғир ва ногиронликка олиб келувчи касалликларга чалинган 10 минг нафар болада жарроҳлик амалиёти ўтказиш;
— 2,3 минг нафар онкологик ва онкогематологик беморларни текширув ва даволашдан ўтказиш;
— камида 350 нафар беморда жигар ва буйрак трансплантацияси амалиётини ўтказиш белгиланди.
Шунингдек, ижтимоий ҳимояга муҳтож болаларнинг омонат ҳисобварақларига 200 АҚШ долларидан пул ўтказилади. Бу ёрдам етим болалар, “Меҳрибонлик” уйлари тарбияланувчилари, ҳарбий хизмат вақтида ҳалок бўлганларнинг фарзандлари ҳамда “Taskin Children’s Hospice” шифохонасида даволанаётган болаларни қамраб олади.
Қарорга мувофиқ, 500 та масжидда замонавий таҳоратхоналар қуриш ва таъмирлаш, шунингдек, қабристонларни ободонлаштириш ишлари ҳам амалга оширилади.
Мазкур тадбирлар давлат мақсадли жамғармалари ва қонунчиликда тақиқланмаган бошқа манбалар ҳисобидан ажратиладиган 690 миллиард сўм маблағ эвазига “Вақф” хайрия жамоат фонди орқали молиялаштирилади.
Ҳудудларда меҳр-саховат тадбирларини мувофиқлаштириш учун махсус кенгашлар ташкил этилади. Шу билан бирга, эҳтиёжманд аҳоли учун эҳсон дастурхонлари ёзиш ва қурбонлик тадбирларини ўтказиш режалаштирилган.
Қарор ижросини назорат қилиш Бош вазир Абдулла Арипов зиммасига юклатилди.
