Ёшлар иттифоқининг саъй-ҳаракати билан Самарқанд вилояти Тайлоқ туманининг Украч қишлоғида туғилган Шероз Сувонов камида 5 йил қамоқ жазосидан қутқариб қолинди, дея хабар берди ЎзА.
Хабарга кўра, Самарқанддаги йирик корхоналардан бирида ишлаган, жамиятда ўз ўрнини топишга интилаётган ёшлардан бири Ш.Сувонов ўз ҳаракатининг ижтимоий хавфлилик даражасини билмаслиги оқибатида Telegram мессенжери орқали “Жесты и катастрофы” каналидаги жангари видеороликни танишига юборган. Бу ножўя ҳаракати учун Шерозга нисбатан ЖКнинг тегишли моддаси билан жиноят иши очилган ва у 5 йилдан 8 йилгача озодликдан маҳрум қилиниши мумкин эди.
Яқинда Жиноят ишлари бўйича Яшнобод тумани суди биносида Тошкент шаҳар судининг сайёр мажлиси бўлиб ўтди. Унда Шероз Сувоновга нисбатан очилган жиноят иши кўриб чиқилди.
Суд мажлисида Ўзбекистон ёшлар иттифоқининг Самарқанд вилояти кенгаши раиси Р.Қобилов, Тайлоқ тумани кенгаши раиси М.Ашуров ҳам иштирок этди ва Ш.Сувонов ҳақида ўз фикрларини билдирди.
Жумладан, Ўзбекистон ёшлар иттифоқининг Самарқанд вилояти кенгаши раиси Р.Қобилов шундай деди:
"Суд мажлисида Шероз Сувоновнинг бу хатти-ҳаракати оқибатини билмасдан содир этгани, бу ишидан чин кўнгилдан пушаймон эканини инобатга олиб, унинг бу хатосини тузатишга биз ҳам ёрдам беришимизни билдирдик. Шерознинг келгусида бундай ножўя ишлар қилмаслиги ва ёшлар иттифоқининг фаол аъзоси бўлиб, диний экстремизм ва терроризмга қарши курашиш тадбирларида қатнашишига, эл-юрт учун керакли кадр бўлиб етишишига кафолат бердик”.
Суд ёшлар иттифоқининг ижобий тавсифномаси ва кафолатини инобатга олиб, судланувчи Ш.Сувоновга тайинланиши мумкин бўлган 5 йилдан 8 йилгача қамоқ жазосини 3 йилгача ахлоқ тузатиш ишига алмаштирди.
