Ўзбекистон матбуот ва ахборот агентлиги тасарруфидаги “Ўқитувчи” нашриёт-матбаа ижодий уйи илк бор Монтессори тизимида болалар учун овозли (гапирувчи) китобча чоп этмоқда.
Мазкур китобча ёрдамида болалар рус алифбоси билан таништирилади. Махсус тугмалар босилганда ҳар бир ҳарфнинг овозли талаффузи янграйди ва болалар ўз талаффузини овозли намуна билан таққослаш имконига эга бўлади.
Ҳар бир саҳифада алифбо ҳарфлари билан бошланадиган нарса-буюмларнинг расми ҳам акс этган. Болалар бу расмлар орқали нарса-буюмлар қандай номланишини эшитиб ўрганиб олиши мумкин. Китобчада ҳар бир ҳарф учун ўша ҳарф билан бошланувчи тўртлик шеърлар берилган. Шеърланинг аудио шакли ҳам мавжуд.
Ушбу китобчадан мактабгача таълим муассасалари тарбиячилари ҳамда ота-оналар фойдаланиши мумкин.
Болалар саҳифада берилган ҳарфларнинг ёзма намуналарини маркер билан ёзиши ва ўчириши мумкин. Бу эса китобдан қайта-қайта фойдаланиш имконини беради.
Мактабгача таълим ёшидан бошлаб ёзув моторикасини, сўзлашув нутқини ривожлантириш билан шуғулланиш жуда муҳимдир. Болалар диққатини матнга жалб қилишда ушбу овозли “АБВГДЕйка” алифбо китоби катта ёрдам беради.
Жумладан:
▪️бола у билан мустақил шуғуллана олади;
▪️у болага хоҳлаганча такрорлаш имконини беради;
▪️бола ўз шахсий ритми асосида ишлай олади.
“Ўқитувчи” нашриёт-матбаа ижодий уйи 2019 йилда ушбу китобнинг ўзбек тилидаги “АЛИФБО”сини ҳамда саноқ сонлар ва ҳайвонлар ҳақидаги вариантини чоп этишни режалаштирган.
