Японияга ёпирилган “Хагибис” тўфони қурбонлари сони 14 нафаргача ошди, яна 16 киши бедарак йўқолган деб ҳисобланмоқда. Бу ҳақда “Киодо” ахборот агентлиги хабар берди.
Жабрланганлар 120 кишидан кўпроқни ташкил қилмоқда.
TBS телеканали эса 22 киши ҳалок бўлгани, 150 га яқин киши жароҳатланганини маълум қилган.
“Хагибис” тўфони 12 октябрда Япониянинг Хонсю оролига ёпирилди. Тўфон марказидаги шамол тезлиги 45 м/сониягача, пойтахт Токиода эса 41 м/сониягача етган. Бундай шамол юк машинаси, дарахтлар ва электр таъминоти устунларини ағдариш учун етарли ҳисобланади. Мамлакатнинг 12 та префектураси, жумладан Токиода кучли ёмғирлар сабабли хавфлиликнинг энг юқори даражаси эълон қилинган.
Кучли шамоллар сабабли электр узатиш линияларида кўплаб узилишлар юз берган. Маълум қилинишича, 376 минг уй электр энергиясиз қолган.
11 млнлик аҳолига эвакуация қилиниш тавсия ёки эълон қилинган.
Шунингдек, тўфон сабабли Токио кўрфазида Панамага қарашли кема чўкиб кетган. Унинг бортида 12 киши бўлган, улардан 3 нафарини қутқаришга муваффақ бўлинган. Экипажнинг қолган 9 аъзоси бедарак йўқолган.
