Тошкентда 17-18 ноябрь кунлари байроқ маршлари бўлади

17-18 ноябрь кунлари Тошкентда Ўзбекистон Республикаси Давлат байроғи қабул қилинганлигининг 28 йиллиги муносабати билан ватанпарварлик руҳидаги маданий-кўнгилочар ва спорт тадбирлари ўтказилиши режалаштирилган. Бу ҳақда Тошкент шаҳар ҳокимлиги Матбуот хизмати маълум қилди.

Миллий ифтихор рамзи сифатида ташкил этилаётган тадбирлар “Давлат байроғи – фахрим, ғурурим!” шиори остида ўтказилади.

17 ноябрь куни:
Соат 11.00 дан 12.00гача Амир Темур хиёбонидан И.Каримов кўчаси бўйлаб Халқлар дўстлиги майдонигача ҳарбий отлиқлар отрядининг Ўзбекистон давлат байроғи марши ўтказилади;
Соат 11.00 дан 12.00гача Яшнобод туманидаги флагшток ўрнатилган майдондан Халқлар дўстлиги майдонигача велоспортчиларнинг Ўзбекистон давлат байроғи марши бўлиб ўтади;
Соат 15.00 дан 17.00гача Ойбек ва Нукус кўчалари кесишмасидан “Хумо арена” муз саройигача “Давлат байроғи – фахрим, ғурурим!” оммавий югуриш марафони ўтказилади;

18 ноябрь куни:
Соат 12:00дан 16:00гача Бектемир туманидаги баланд флагштокка Давлат байроғи ўрнатилган айланма йўлда маданий-кўнгилочар ва спорт тадбирлари ўтказилади;
Соат 16:00дан 17:00гача Бектемир туманидаги флагшток ўрнатилган майдондан Халқлар дўстлиги майдонигача авто, мотоҳаваскорлар жамоаларининг Ўзбекистон давлат байроғи марши бўлиб ўтади;
Соат 16:00дан 19:00гача Яшнобод туманидаги баланд флагштокка Давлат байроғи ўрнатилган хиёбонда байрам тадбири ташкил этилади;
Соат 16.00 дан 20.00гача Халқлар дўстлиги майдонида асосий байрам тадбири ўтказилади.

Миллий рамзларимизга ўз ҳурмат ва эътиборингизни намоён этинг ва ватанпарварлик руҳидаги тадбирларимизда иштирок этинг.