АҚШдаги Жеффри Эпштейн билан боғлиқ можаро яна халқаро жамоатчилик эътиборига тушди. Бу сафар АҚШ Конгрессида ўтказилган эшитувларда Ўзбекистондан чиққан модель ҳам гувоҳ сифатида иштирок этди.
Маълум қилинишича, ўзини фақат “Roza” деб таништирган аёл Эпштейн томонидан зўравонликка учраганини айтган. Унинг таъкидлашича, ўша вақтда у 18 ёшли ўзбекистонлик модель бўлган ва француз модель скаути Жан-Люк Брюнель орқали АҚШга “талант визаси” билан олиб келинган.
Роза Конгрессдаги чиқишида унга Америкада муваффақиятли модель карьераси ваъда қилинганини, аммо орадан кўп ўтмай Эпштейннинг Флоридадаги уйига юборилганини маълум қилди.
“Менга орзудагидек модель карьераси ваъда қилинган эди. Лекин АҚШга келганимдан бир ой ўтар-ўтмас жинсий жиноятчи сифатида рўйхатда турган одамнинг уйига юборилдим”, — деган у кўз ёшлари билан.
Розанинг иддаосига кўра, бу вақтда Эпштейн аввалги жиноятлари учун қамоқда бўлиши керак бўлган. Бироқ у “уй қамоғи” шароитида сақланган ва кундузи эркин ҳаракатланган.
Ўзбекистонлик модель Эпштейн уни уч йил давомида босим ва қўрқув орқали назорат қилиб келганини айтди. Айниқса, унинг виза мақоми босим воситаси сифатида қўллангани таъкидланган.
Мазкур эшитув АҚШ Конгресси Вакиллар палатасининг назорат ва ҳисобдорлик қўмитаси томонидан ўтказилмоқда. Унда Эпштейннинг халқаро жинсий эксплуатация тармоғи қандай фаолият юритгани ўрганилмоқда.
Сўнгги ойларда “Epstein files” деб аталувчи ҳужжатлар ва ёзишмаларда Ўзбекистон номи ҳам бир неча бор тилга олинган. Айрим материалларда “Uzbek girls”, “Tashkent” ва “Uzbek visa” каби иборалар учраган.
