Жорий йилнинг 18 декабрь куни Тошкентда Адлия вазирлиги ташаббусига кўра ҳамкор ташкилотлар билан биргаликда харид муносабатлари бўйича хориж тажрибаси ва давлат харидлари бўйича қонунчиликда мазкур тажрибани қўллаш масалалари бўйича семинар ташкил этилди.
Семинарни ўтказишдан асосий мақсад харид қилиш тартиб-таомиллари, шунингдек йирик трансмиллий компанияларнинг харид муносабатлари соҳасидаги халқаро тажрибани ҳар томонлама ва атрофлича ўрганиш натижасида тўғридан-тўғри амал қилувчи қонунни ишлаб чиқиш ҳисобланади.
Семинар ишида бир қатор хорижий мутахассислар, вазирлик ва идоралар, хўжалик бошқаруви органларининг вакиллари ҳамда бошқалар иштирок этдилар.
Қайд этилганидек, Ўзбекистон Республикасида 2018 йилнинг апрель ойида давлат харидлари соҳасидаги муносабатларни тартибга солувчи асосий ягона ҳужжат “Давлат харидлари тўғрисида”ги Қонун қабул қилинган. Мазкур Қонун қабул қилинмасдан аввал давлат харидлари соҳасидаги муносабатлар 30 дан ортиқ норматив-ҳуқуқий ҳужжатлар орқали тартибга солинар эди.
Шу сабабли давлат харидлари тизимининг яхлитлиги йўқ эди, натижада мазкур соҳада кўплаб ҳуқуқий коллизиялар келиб чиқди. Кўп босқичли келишувлар ва бир-бирини такрорловчи жараёнлар ортиқча вақт сарфланишига ҳамда мазкур соҳада коррупциянинг вужудга келишига сабаб бўлди.
Давлат харидлари бўйича махсус ахборот портали – xarid.uz яратилди. Унда давлат харидлари соҳасидаги қонун ҳужжатлари ва ушбу соҳада бериладиган кўплаб саволларга жавоб топиш мумкин.
Давлат харидлари тартиб-таомилларини янада такомиллаштириш мақсадида ушбу соҳани ва бу бўйича илғор тажрибани ўрганиш давом этмоқда, унга мувофиқ янги қонун лойиҳаси ишлаб чиқилди. Ушбу Қонунни янги таҳрирда тайёрлашдан асосий мақсад давлат буюртмачилари томонидан давлат харидлари жараёнларига тадбиркорлик субъектларини кенг жалб қилиш ҳамда ушбу жараёнларда очиқлик ва шаффофликни таъминлашга қаратилган қоидаларни белгилашдир.
Семинар давомида давлат харидлари тўғрисидаги қонунчиликни такомиллаштиришнинг долзарб масалалари муҳокама қилинди. Бундан ташқари, иштирокчилар харид қилиш тартиб-таомиллари хориж тажрибаси ва уни қўллаш масалалари ҳақида фикр алмашилди.
Ўзбекистон Республикаси Молия вазирлигининг вакили семинар иштирокчиларини янги таҳрирдаги “Давлат харидлар тўғрисида”ги Қонун лойиҳасида назарда тутилаётган асосий ўзгаришлар билан таништирди.
Семинар якунида иштирокчилар харид жараёнларини бошқариш ва ташкил этиш соҳасида тажриба алмашиш бўйича ҳамкорликни давом эттириш истагини билдирдилар.
Адлия вазирлиги
Жамоатчилик билан алоқалар бўлими
