Янги йил байрами арафасида Наманганда катталиги бўйича республикада иккинчи ўринда турадиган кутубхона қурилиб фойдаланишга топширилди. Бу ҳақда Комил Алламжонов ўз телеграм каналида маълум қилди.
"2019 йил ҳам ниҳояланиб бормоқда. Ушбу кутубхона Президентимиз томонидан бизнинг Агентлигимиз олдига шу йилда вазифа қилиб қўйилган энг охирги катта лойиҳа эди.
Мана, жамоамиз билан бирга уни ҳам якунлаб, фойдаланишга топширдик. Умид қиламанки, катталиги бўйича иккинчи ўринда турадиган кутубхона Наманган ёшлари учун илм маскани бўлади.
Йил жуда ҳам сермазмун ўтди. Бир томондан, кунлар кўз юмгандек ўтиб кетган бўлса, иккинчи томондан, бир йил худдики 5 йилдек туюлиб кетади. ЎзМАА АОКАга айланди. Журналистлар, блогерлар, кутубхоначилик фаолияти йил трендларига чиқди. Китобхонлик акциялари, сайловлар ҳам ўтди. Ҳисоботларда сўз эркинлиги, матбуот эркинлиги алоҳида эътироф этилди. Агар санаб чиқилса, қилинган ишларнинг рўйхати катта.
Ўтган даврда кимгадир аччиқ хақиқатларимиз қаттиқ тегиб кетди (минг узр, касбимиз шунақа), кимнингдир дардига малҳам бўлишга ҳаракат қилдик, муаммоларни кўтардик, аксариятини ижобий ҳал қилдик, қилолмаганимизни кейинга олиб қўйдик. Лекин нима бўлганида ҳам, Агентлигимиз тинмади. Ватан учун, юрт учун тинмади. Ҳалол бўлишга ҳаракат қилдик, ишончни оқлашга интилдик.
Янги йилга 7 кун қолди. 2020 йил ҳаммага омад олиб келсин! Агентлигимизнинг ҳамма ходимларига эса барча ютуқлар учун катта раҳмат айтмоқчиман. Кўз тегмасин илоҳим!" деб ёзилади хабарда.
Намангандаги янги ишга туширилган йирик ахборот ресурс маркази вилоятлик китобхон ёшлар учун ажойиб маърифат маркази бўлиши шубҳасиз. Видео:
