Янги йилнинг дастлабки кунларидаёқ кучли ёққан ёмғир натижасида Самарқанд шаҳридаги Рудакий кўчасининг қурилиш-монтаж ишлари олиб борилган қисмида чўкиш ҳолати кузатилгани ҳақида хабарлар ижтимоий тармоқларда ҳам кенг муҳокамаларга сабаб бўлгани ҳақида хабар берган эдик.
Ижтимоий тармоқларда Самарқанд шаҳрининг марказий кўчаларидан бирида ер чўкиши содир бўлгани акс этган фото ва видеолар тарқалди. Изоҳланишича, шаҳарнинг Рудакий кўчасида ёмғир ёғиши натижасида асфалтнинг аввал кавланиб ямалган қисми чўкиб, автобус ботиб қолгани ҳақида виедолар тарқалган
Шундан сўнг, вазият бўйича Самарқанд шаҳар ҳокимлигининг расмий ахбороти эълон қилинди.
Кузатилган ҳолат бўйича вилоят ҳокимлиги томонидан Давлат молиявий назорат бошқармаси, қурилиш назорати инспекцияси ҳамда Йўл-қурилиш ишлари сифатини назорат қилиш ва Ичимлик сувини назорат қилиш инспекцияси мутахассисларидан иборат ишчи гуруҳ тузилди.
Маълумотларга кўра, ушбу объектда қурилиш-монтаж ишлари “Сув таъминоти ва оқова сув объектлари қурилиши бўйича инжиниринг компанияси” ДУК Самарқанд вилоят ҳудудий бошқармаси буюртмаси асосида “Бағдод Карвон” МЧЖ томонидан олиб борилган.
Аниқланишича, ушбу кўчада 2 миллиард сўмлик қурилиш ишлари сифатсиз бажарилгани аниқланган.
