10 январь куни Чэнду-Тошкент-Чэнду биринчи чартер рейсида 90 миллиондан зиёд аҳоли истиқомат қилувчи Сичуань провинциясининг оммавий ахборот воситалари ҳамда туроператорлар вакиллари ташриф буюришди.
Рейснинг “Zhejang Loong Airlines Co.Ltd” президенти Лю И бошчилигидаги илк меҳмонлари Тошкент халқаро аэропортида тантанали равишда кутиб олинди.
“2020 йилнинг 1 январидан Хитой фуқаролари учун визасиз режимнинг жорий қилиниши натижасида жуда кўп хитойликлар Ўзбекистонга кела бошлайди. Шу билан бирга, LoongAir компанияси Хитой оммавий ахборот воситалари билан яқиндан ҳамкорлик қилиб, уларни Ўзбекистон билан яқиндан таништиришни мақсад қилган. Ўйлайманки, яқин орада ушбу сафар натижалари албатта намоён бўлади”, - деди авиакомпания президенти Лю И.
Маълумот учун: LoongAir компанияси 2011 йилда ташкил топган. Авиакомпания 46 ҳаво кемаси ва 3 юк самолётига эга. Компания 14 халқаро ва ҳудудий йўналишлар бўйича 269 йўловчи ва юк ташиш йўналишини очган.
Туризмни ривожлантириш давлат қўмитаси раисининг ўринбосари Улуғбек Аъзамовнинг фикрича, бу каби рейсларнинг кўпайиши мамлакат иқтисодиётига қўшадиган улушлари жиҳатидан энг юқори поғоналарда бўлган сайёҳлар оқимининг кескин ошишига олиб келади. “Қисқа вақт ичида Хитойнинг иккинчи шаҳридан тўғридан-тўғри чартер рейс йўлга қўйилди. Туризмни ривожлантириш давлат қўмитаси “Zhejang Loong Airlines” компанияси ҳамкорлиги натижасида йўлга қўйилаётган шу каби рейслар юртимизга ташриф буюрувчи хорижлик сайёҳлар сонининг ошишига ҳаракат қилади, жумладан, бу йил давомида хитойлик сайёҳлар сонининг икки карра ошиши кутилмоқда. Бугунги кунда жаҳонда Ўзбекистонга бўлган қизиқиш катта, юртимизга келаётган хорижликлар сонининг йилдан-йилга ошиши шундан далолат беради. Таъкидлаш жоизки, Хитой бозор сифатида Ўзбекистон учун жуда муҳим, зеро хитойлик сайёҳлар бошқа давлатлар иқтисодиётига қўшадиган улушлари жиҳатидан энг юқори поғоналарни забт этишган”, - деди у.
Таъкидлаш лозимки, «Zhejang Loong Airlines Co.Ltd.» авиакомпаниясининг илк чартер рейси - “Сиань-Тошкент-Сиань” 27 сентябрь куни амалга оширилган. Шунингдек, айни дамда ХХРнинг Хуанчжоу шаҳридан ҳам авиарейсларни йўлга қўйиш устида иш олиб борилмоқда. Бундан аввал Ўзбекистон делегациясининг Хитой Халқ Республикасига ташрифига доирасида Туризмни ривожлантириш давлат қўмитаси раиси в.в.б. Абдулазиз Аққулов яқин орада Чэндудан Тошкентга рейслар йўлга қўйилиши ҳақида маълум қилган эди.
