Тошкент давлат аграр университетида ҳарбий қисм қўмондонлиги тавсиясига биноан бир гуруҳ муддатли ҳарбий хизматчилар олий ўқув юртларига кириш учун имтиёзли тавсияномани қўлга киритиш учун тест имтиҳонларини топширдилар. Бу ҳақда Мудофаа вазирлиги Ахборот ва оммавий коммуникациялар департаменти маълум қилди.
Имтиҳонлар бошланишидан олдин, Вазирлар Маҳкамаси ҳузуридаги давлат тест маркази ходимлари томонидан йўриқнома ўтказилди. Тест бланкалари тўғри тўлдирилгандан сўнг, ҳарбий хизматчилар уч соат мобайнида 100 та тестларни ечиши лозим. Улар математика, физика, мантиқий масалаларга қўшимча равишда жанговар ва маънавий-маърифий тайёргарликлар бўйича ҳам саволларга жавоб топадилар.
Максимал балл 110 ни ташкил этади. Синовларни ўтказишда шаффофликни таъминлаш мақсадида аудиторияларга кузатув камералари ўрнатилди, электрон таблода қолган вақт қайд этиб борилди.
Бугунсамарқандлик оддий аскар Худойназар Тангиров учун муҳим кун. У ерда бўлган барча ҳарбий хизматчилар сингари у ҳам ҳарбий хизматга тайёргарлик кўрган, унинг орзуси Ўзбекистон Республикаси Қуролли Кучлари академиясига ўқишга кириш.
– Ҳарбий хизмат давомида, – дейди оддий аскар Худойназар Тангиров, – биз ҳарбий санъатни синчковлик билан ўрганамиз, жисмоний тайёргарликдан ўтамиз. Бунинг учун ҳарбий қисмда барча шароитлар яратилган. Ҳарбий қисм қўмондонлиги тавсияси туфайли назарий ва амалий машғулотлар давомида олган билимларимизни синаб кўриш имкониятига эга бўлдик.
