Фарғонада қалбаки диплом тайёрлаб берган коллеж директорига нисбатан товламачилик қилган шахс ушланди. Бу ҳақда “darakchi.uz”га Бош прокуратура Матбуот хизмати маълум қилди.
Келтирилишича, фуқаро Н.И.га Риштон тумани политехника касб-ҳунар коллежи директори А.Р.ни 100 АҚШ доллари эвазига коллежни тамомлаганлиги ҳақида сохта диплом тайёрлаб берган.
Шундан сўнг, фуқаро ушбу ҳолатни тасдиқловчи аудиоёзувни ҳуқуқни муҳофаза қилувчи органларга тақдим этиши билан қўрқитиб, директор А.Р.дан 500 АҚШ доллари талаб қилган. Ушбу келишув асосида фуқаро коллеж раҳбаридан айтилган сўммани олаётган вақтида ушланган.
Тадбир якуни бўйича фуқаро Н.И.дан қалбаки коллеж дипломи (иловаси билан), А.Р. томонидан ёзилган тилхат ва “Samsung Galaxy” русумли телефон аппарати ашёвий далил сифатида олинган.
Мазкур ҳолат юзасидан фуқаро Н.И. ҳамда коллеж директори А.Р.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
