“Ўзбекнефтгаз”АЖнинг Муборак нефт ва газ қазиб чиқариш бошқармасидаги “Помуқ” сиқув компрессор станциясидаги агрегатнинг носоз компрессори таъмирланиб ишга туширилди. Бу ҳақда жамиятнинг Матбуот хизмати хабар бермоқда.
Ушбу станциянинг асосий вазифаси захираси кам конлардаги паст босимли қудуқлардан келадиган газларни қабул қилиб, босимини кўтариб Газни комплекс тайёрлаш қурилмасига узатишдан иборат.
Айнан газ босимини кўтариб бериш вазифасини эса станцияга ўрнатилган 4 та агрегат бажаради. Яқинда мутахассислар томонидан уларнинг бирида носозлик мавжудлиги аниқланди. Яъни агрегатнинг юраги бўлмиш компрессордан газ сизиб чиқаётганлиги маълум бўлди.
– Маълумки, “Ўзбекнефтгаз” АЖ томонидан қазиб олинадиган умумий газ ҳажмининг 80 фоизи Муборак нефт ва газ қазиб чиқариш бошқармасининг ҳиссасига тўғри келади, - дейди Сиқув компрессор станцияларини ишлатиш бўлими бошлиғи Аҳмедов Жасур. – Битта газ ҳайдаш агрегатининг ишламасдан тўхтаб қолиши эса бошқарма томонидан суткасига 2,850 млн. кубометр газ етказиб бериш ҳажмини камайишига олиб келади.
Шу сабаб ушбу компрессорни тезкор равишда тузатиб ишга тушириш учун “Ўзбекнефтгаз”АЖ Бошқаруви раиси Меҳриддин Абдуллаев топшириғи билан 3 сменали 24 соатлик иш режими ташкил қилинди.
Агрегат компрессорининг ротори олд ва орқа қисмларида ўрнатилган зичлагичлар янгисига алмаштирилди. Шу билан бирга компрессорнинг ички қисмлари – подшипниклари, лабиринтли зичлагичларнинг техник ҳолати назоратдан ўтказилди.
Натижада компрессорнинг узлуксиз бир маромда ишлашини таъминлашга ҳамда табиий газ қисқаришининг олдини олишга эришилди.
Маълумот учун: Украинанинг «Сумское НПО» заводи томонидан ишлаб чиқарилган ушбу агрегатлар 2008 йилда “Помуқ” сиқув компрессор станциясига олиб келиб ўрнатилган.
