“Ўзбеккино” Миллий агентлиги ташаббуси билан жорий йилнинг 19 март куни ўтиши белгиланган ижодий конференция номаълум муддатга қолдирилди. Бу ҳақда “Ўзбеккино” Миллий агентлиги матбуот хизмати маълум қилди.
“Аввал хабар қилганимиздек, жорий йилнинг 17 март куни “Ўзбеккино” Миллий агентлиги томонидан Ўзбекистон киноарбоблар ижодий бирлашмаси билан ҳамкорликда 2019 йилда давлат буюртмаси асосида суратга олинган фильмлар бўйича ижодий конференция ўтказилиши белгиланган эди. Анжуман олдидан “Ўзбеккино” Миллий агентлиги биносида 11-14 март кунлари ўтган йили давлат буюртмасига асосан суратга олинган бадиий, ҳужжатли, қисқа метражли ва анимацион фильмлар ҳамда хусусий студиялар ишлаб чиқарган бир қатор фильмлар белгиланган режа асосида томошабинларга ҳавола этилди.
Бироқ, 2020 йилнинг 15 март якшанба куни мамлакатимизда илк бор коронавирусга чалинган бемор аниқлангани, Ўзбекистон ҳукумати томонидан мазкур хасталик тарқалишининг олдини олиш юзасидан берилган тавсиялардан келиб чиқиб, мазкур ижодий конференция қолдирилганини маълум қиламиз. Юзага келган ноқулайлик учун узр сўраймиз” – дейилади матбуот хизмати тарқатда маълумотда.
Эслатиб ўтамиз, сал аввалроқ, “Ўзбеккино” Миллий агентлиги мамлакатимиздаги барча кинотеатрлардаги намойишлар ҳамда хорижий кинокомпаниялар билан ҳамкорликдаги кинолойиҳаларни суратга олиш ишлари вақтинча тўхтатилганини маълум қилган эди.
