Ҳозирда юзага келган фавқулодда вазиятни етарли баҳолай олмаётган фуқаролар ҳам орамизда учраб турибди. Хусусан жорий этилган карантин шартларини писанд қилмасдан, ўзбошимчалик билан карантин ҳудудларини тарк этишга уринаётган кишилар ҳам бор. Улар, албатта, масъул органлар томонидан қўлга олиняпти.
Яқинда шундай ҳатти-ҳаракат паркетлик фуқаро томонидан содир этилгани ҳақида хабар берган эдик. Яна бир шундай ҳолат юзасидан Миллий гвардия ахборот берди.
Хусусан бугун 21-март куни 1975 йилда туғилган наманганлик фуқаро Aббосов М.Р. эпидемик вазиятга кўра жойлаштирилган Қашқадарё вилоятидаги карантин марказини тарк этмоқчи бўлганида ушланган. Бу фуқаро Жорий йил 20 март куни Россия Федерациясининг Москва шаҳридан “Москва-Тошкент” поезди орқали Ўзбекистонга кириб келган ва карантинга олинган бўлган.
Фуқаро 21-март куни соат 15.30 да белгиланган тартиб қоидаларга амал қилмасдан, карантин маркази деворидан ошиб ўтиб, қочишга ҳаракат қилган. Бу вақтда карантин ҳудуди бўйлаб хизмат олиб бораётган Миллий гвардия Қўриқлаш хизмати ходими томонидан қўлга олинган.
Ҳозирда ушбу шахсга нисбатан жиноят иши қўзғатиш чоралари кўрилмоқда.
