Ҳар куни телевизордан ҳам, кўчада ҳам эшитиб келаётганимиз “Уйда қолинг” ундови пойтахт экологиясида катта аҳамият касб этди. Шаҳримиз анча тоза бўлиб қолганини сездингизми?
Кўпчилигимиз шу кунларда уйдан фақат заруриятга кўра чиқаяпмиз. Бу чиқиндиларнинг кўчада ташланиши мумкин бўлган катта қисми уйда қолаётганидан, кейин эса белгиланган жойга ташланишидан далолатдир.
Бироқ шу билан бирга, пиёдалар йўлаклари, газон қопламалари, болалар ўйин майдончаларида фойдаланиб ташлаб кетилган тиббий ниқоблар кўзга ташланмоқда. Аввал коронавирусни юқтиришдан ҳимоя қилган ниқоб шу тариқа ўзи инфекция манбаига айланмоқда.
Вужудга келган вазиятга Тошкент шаҳар экология ва атроф-муҳитни муҳофаза қилиш бошқармаси мутахассиси Камолиддин Арипжановнинг изоҳи қуйидагича:
Ҳозирда шаҳримиз кўчаларида кузатилаётган ташлаб юборилган тиббий ниқоблар ёки қўлқоплар, нафақат экологияни ифлослайди, балки инфекция манбаидир. Шунинг учун уларни ёпиқ баклар, контейнерлар ва чиқинди йиғиш жойларига ташлаш лозим.Шу кунларда биз атроф-муҳитга алоҳида эътибор беришимиз ва касаллик юқтиришнинг энг кичик хавфига ҳам йўл қўймаслигимиз лозим.
Шунинг учун, атроф-муҳитни асраш ва сизу бизнинг саломатлигимизни авайлаш учун ниқобларни белгиланмаган жойларда ташламанг!
