Юртимизда аҳоли саломатлигини ўйлаб жорий этилган карантин тартибига қарамай, кўплаб фуқаролар томонидан ҳали-ҳамон ушбу қоидаларга беписандлик билан қараш ҳолати учрамоқда.
Хусусан, Вобкент туманида яшовчи, 1969 йилда туғилган фуқаро ўзининг бошқарувидаги жигули автомашинасида 36 ёшли таниш аёли билан Шофиркон тумани ҳудудига киришда ташкил этилган карантин постдан ўтаётганда шу ерда хизмат олиб бораётган ЙПХ ходими томонидан тўхтатилган.
Инспектор ҳайдовчидан машинанинг ҳужжатларини сўраган. Суҳбат жараёнида ЙПХ ходими ҳайдовчининг спиртли ичимлик ичганига шубҳа билдиргани ва карантин қоидаларини бузиб, тиббий ниқобдан фойдаланмаётганини билдирганда фуқаро ножўя сўзлар билан хизматдаги шахсни ҳақорат қилган. Шунингдек, инспекторнинг қонуний талабларини бажармаган. Бундан ташқари ҳайдовчининг ёнидаги аёл ҳам спиртли ичимлик таъсирида бўлиб, у ҳам ИИБ ходимига кўрсатилган қаршиликда фаол иштирок этади.
Айни пайтда улар, ўз қилмишидан пушаймонлиги ҳақида кўрсатма берган. Бироқ, энди кеч. Қоидабузар фуқаролар — ҳайдовчига 15 сутка, 36 ёшли аёлга эса 10 сутка қамоқ жазоси белгиланди.
