Жорий йилнинг 10 апрель куни Тошкент вилояти Юқори Чирчиқ туманида жойлашган карантин ўташ махсус ҳудудида бўлган ва уйига жавоб берилган фуқароларни доимий яшаш манзилларига етказиб қўйиш давомида автобус ҳайдовчиси ва йўловчиларнинг ўзаро тушунмовчилиги сабаб ҳақиқатан ҳам 3 нафар фуқарони ўз манзилига (Алгоритм мавзеси) етказмасдан, Фарход бозори атрофида тушириб қолдирган. Натижада ушбу фуқаролар йўлда қолиб кетишган. Бу ҳақда Транспорт вазирлиги Ахборот хизмати раҳбари Наврўз Ашурматов брифингда маълум қилди.
Ҳайдовчининг ушбу хатоси сабаб унга нисбатан маъмурий жавобгарлик жазоси қўлланилган.
Юқоридаги каби салбий ҳолатларнинг олдини олиш мақсадида Тошкент вилояти Юқори Чирчиқ туманида жойлашган карантин ўташ махсус ҳудудида бўлган фуқароларни ўз манзилларига уйларига етказиб қўйиш учун "Тошшаҳартрансхизмат" АЖ ва Тошкент шаҳар ички ишлар бош бошқармаси билан биргаликда махсус йўналишлар ишлаб чиқилиб, ушбу йўналиш бўйича фуқароларни манзилларга етказилмоқда, деди Н.Ашурматов.
