Наманган вилояти, Поп туманининг Ғурумсарой қишлоғида 1200 кишилик карантин зонаси ҳамда 150 кишилик махсус шифохона қурилмоқда, дея хабар тарқатди вилоят ҳокимлигининг ахборот хизмати.
Умумий майдони 16, 3 гектарни ташкил қиладиган ушбу комплексда шифокорларга алоҳида хона, жарроҳлик, жонлантириш бўлимлари, муолажа хоналари, тиббиёт бўлимларидан ташқари карантин ҳудудига келтирилганлардан шу ернинг ўзида таҳлил олиш учун лаборатория, дорихона, ошхона, кир ювиш бўлими, утилизация бўйича алоҳида жой ҳам қурилмоқда. Вентиляция, тиббий кислород етказиб бериш, коммуникация тизимлари ҳаммаси замонавий тарзда жиҳозланади.
Қурилиш майдонига электр энергияси, газ, сув тармоқлари тортиш бўйича ҳам ишлар юқори суръатда ташкил этилган.
Карантин зонаси махсус жиҳозланган контейнерлардан ташкил топади. Шифохона эса енгил конструкциялар асосида барпо этилади.
Худди шундай карантин полигони Тошкент вилоятининг Юқори Чирчиқ туманида, Зангиота туманида эса шифохона барпо этилаётгани ҳақида аввал хабар берилганди.
Шунингдек, Андижон, Навоий ва Сурхондарё вилоятларида ҳам коронавирус билан касалланганлар ва уларнинг карантини учун худди шундай муассасалар қурилаётгани айтилганди.
