Оксфорддаги Женнер университети олимлари томонидан COVID-19га қарши яратилган вакцинани оммавий ишлаб чиқариш йўлга қўйилади. Лекин, у ҳали клиник синовдан ўтказилмаган. Бу ҳақда Рейтерс хабар берган.
Вакцина Буюк Британия, Европа қитъаси, Ҳиндистон ва Хитойдаги еттита корхонада ишлаб чиқарилади.
Бунга параллел тарзда вакцинани одамларда синаб кўриш учун кўнгиллиларни йиғиш ҳақида ҳам эълон қилинди. Клиник синовларни жорий йил сентябрь ойига келиб якунлаш ва шундан сўнг қарийб миллион дозада етказиб бериш режалаштирилмоқда.
Агар синовлар вакцина муваффақиятини тасдиқласа, уни ялпи ишлаб чиқариш жараёнлари зудлик билан бошлаб юборилади. Акс ҳолда корхоналар бундан ўн миллионлаб фунт стерлинг зарар кўради.
ЖССТ апрель аввалида айни пайтда тождор вирусга қарши 70 та турли хил вакцина яратилаётганини маълум қилганди. Ҳозирда улардан камида биттаси одамларда синовдан ўтказиляпти.
