Ижтимоий тармоқларда тарқалган видеохабарга кўра, Москвада ишсиз қолган беш нафар Ўзбекистон фуқароси кўчада ота ва ўғлига ҳужум қилиб, уларни шафқатсизларча калтаклаган. Бу безорилик икки минг рубл учун қилинганлиги айтилмоқда.
Таъкидланишича, ҳужум апрел ойининг бошларида Петровско-Разумовское даҳасидаги турар-жой биноси яқинида бўлган. Видеолавҳада бир неча эркакни йўловчиларга ҳужум қилишганини, икки эркакни калтаклаб чўнтакларидан нимадир олганини кўриш мумкин.
Маълум қилинишича, жабрланганлар касалхонага ва полицияга мурожаат қилишган. Тўрт кун ўтгач, 9 апрел куни жиноятчилар қўлга олинган. Улар ишсиз қолган ва яшаш учун пул излаётган ўзбекистонлик меҳнат муҳожирлари гуруҳи эканлиги маълум бўлган.
