Дунёда коронавирус пандемияси авж олган бир шароитда юртимизда ушбу хасталикдан тузалганлар сафи тобора кенгайиб бораётгани қувонарлидир. Хусусан, Фарғона вилоятида ҳам малакали шифокорлар ва соҳанинг барча фидойи ходимлари саъй-ҳаракати туфайли ўнлаб оилалар яна тўкис бахт шукуҳидан баҳраманд бўлмоқдалар. Бу ҳақда Санитария эпидемиологик осойишталиги агентлиги хабар берди.
Хабарингиз бор, куни кеча Фарғона вилояти юқумли касалликлар шифохонасида коронавирус инфекциясидан тузалган 4 нафар бемор реабилитацияга кузатилди.
Уларнинг орасида Ёзёвон туманидан коронавирусга чалинганлар билан мулоқотда бўлиб, касалликни юқтириб олган бемор ҳам бор эди. У энди реабилитация муддати жараёнида маълум вақт давомида тиббий назоратда бўлгач, қадрдон оиласи даврасига қайтиши мумкин.
- Касаллик ҳудди бир ёмон тушдек ортда қолганидан хурсандман, -дейди. – Бундай синовли кунларда сени оқ ювиб, оқ тараган ота юртнинг қадри, куч-қудратини яққол ҳис этаркансан. Президентимиз, ҳар бир юртдошимизнинг меҳри ва эътибори бизга беқиёс қувват бахш этди. Барчаси учун катта раҳмат!
- Фарғоналик шифокорларга чексиз миннатдорчилик билдираман. Вилоят юқумли касалликлар шифохонасида беморлар бу касалликдан тузалиши учун барча шароитлар муҳайё этилган. Биз даволаниш жараёнида бирор-бир қийинчиликка учрамадик. Шундай меҳрибон Юртбошимиз, ғамхўр давлатимиз борлигидан беҳад мамнунмиз, - деб дил изҳорларини якунлайди дарддан фориғ бўлганлардан бири андижонлик 59 ёшли онахон.
