Зангиота туманида инсон жонига суиқасд қилинганлик ҳолати аниқланди. Бу ҳақда "darakchi.uz"га Бош прокуратура Матбуот хизмати раҳбари маълум қилди.
Аниқланишича, кеча, 20 апрель куни соат 03:00 ларда Зангиота тумани, Қуёшли маҳалласида 2003 йилда туғилган А.Қ. икки нафар шериги билан уларга олдиндан таниш бўлган 2002 йил туғилган қиз К.Р. билан ўзаро жанжаллашиб қолади. 17 ёшли йигит ошхона пичоғи билан қизнинг бўйин, қорин хамда танасининг турли қисмларига уради. Шундан сўнг йигитлар жиноят изини яшириш мақсадида қизни шу ердан оқиб ўтувчи “Туябўғиз” каналига ташлаб юбориб, ҳодиса жойидан яширинганлар.
К.Р. олган тан жароҳатларига қарамасдан, каналдан чиқиб, ўз уйига етиб борган ва яқинлари томонидан туман тиббиёт бирлашмасининг жонлантириш бўлимига ётқизилган. Кўрсатилган тиббий ёрдам сабаб унинг ҳаёти сақлаб қолинган.
Мазкур ҳолат юзасидан шу куни А.К. ва бошқаларга нисбатан ЖКнинг 25,97-моддаси 2-қисми “п” банди билан жиноят иши қўзғатилган. Айни пайтда айбдорлар ушланган.
