Шу йил апрель ойининг дастлабки ҳафтасида Россия Федерацияси, Туркия ва транзит тарзида бошқа давлатлардан алоҳида ташкил этилган чартер авиарейслари орқали юртимизга қайтиб келган 241 нафар ватандошимиз қатъий карантин тартиб-қоидаларига биноан 14 кунлик тиббий кузатувга олинган ва улар устидан назорат ўрнатилганди.
Жаҳон Соғлиқни сақлаш ташкилоти ҳамда республика Махсус Комиссиясининг тавсиясига мувофиқ 14 кунлик изольяцияга олинган фуқароларда ўта хавфли юқумли касаллик аломатлари аниқланмаганлиги сабабли уларга уйларига қайтишларига рухсат берилди. Бу ҳақда Бухоро вилояти ҳокимлиги хабар қилди.
Вилоят ҳокимлиги ва тегишли хизматлар томонидан ташкил этилган темир йўл рейслари туфайли 182 нафар юртдошимиз “Бухоро-Андижон” йўналишидаги поездда уйларига кузатилган бўлса, Қорақалпоғистон республикаси ва Хоразм вилоятидан бўлган 45 нафар ватандошимиз “Бухоро-Нукус” темир йўли орқали оилалари ва яқинлари бағрига қайтарилди. Карантин тадбирларидан муваффақиятли ўтганларнинг 14 нафари бухороликлар ва улар ҳам ўзига хос мураккаб синовни бошдан кечириб, эндиликда тинч-осойишта турмушга қайтганликларидан мамнун.
Таъкидлаш жоизки, маҳаллий аҳоли саломатлигига хавф туғдирмасликлари учун карантинда сақланганларга барча зарур шароит яратиб берилиши, уларнинг саломатлиги малакали тиббиёт ходимлари томонидан доимий кузатувда бўлгани, қолаверса, тинчлик-осойишталик ва жамоат тартиби нуқтаи назаридан ички ишлар хизматчилари ва ҳарбийлар томонидан узлуксиз назорат остида бўлишлари давлатимиз ва ҳукуматимиз томонидан кўрсатилаётган ғамхўрлик ва эътибор намунасидир. Изоляция тадбирларининг юқори даражада ташкиллаштирилгани боис ҳам улар тиббий текширувлар, лаборатор ва диагностик таҳлиллардан муваффақиятли ўтдилар. Бугунга келиб эса карантинда сақланганлар махсус автомашиналарда ўз уйларига кузатилдилар.
Шунингдек Андижон вилоятининг Хўжаобод туманида карантинда бўлган 130 нафар фуқаролар ҳам соғ-омон ўз уйларига йўл олишди.
Улар 2020 йилнинг 6-апрель куни қўшни Қирғизистон Республикаси “Дўстлик” чегара постидан юртимизга кириб келган ва Хўжаобод тумани 4-махсус мактаб интернати ётоқхонасига жойлаштирилган эди.
Тиббий кузатувда бўлган 130 нафар фуқароларнинг 83 нафари Андижон вилоятидан, 14 нафари Фарғона вилоятидан ва 33 нафари эса Наманган вилояти фуқароларидир.
2020 йилнинг 20 апрель куни кузатувда бўлган фуқароларимиз чуқурлаштирилган тиббий кўриклардан ўтказилди. Махсус тестдан ўтказилиб текширилганда вирус аниқланмаганлиги ҳамда касаллик тарқатиш хавфи йўқлигини инобатга олиб улар оилалари бағрига қайтишга рухсат берилди.
