Бу ҳақда Ўзбекистон ёшлари умумжаҳон ассоциациясининг Германия Федератив Республикасидаги вакили Камолиддин Бедиев маълум қилди:
"Aйни вақтда биз Германиядаги диаспора вакиллари билан авиақатновлар тўхтатилгани боис Франкфурт шаҳрида Ўзбекистонга кета олмай қолган 22 нафар Ўзбекистон фуқароларига нисбатан ёрдам акциясини уюштирганмиз.
Ўзбекистоннинг Франкфурт-Майн шаҳридаги Бош консулхонаси, “Ҳумо” ўзбек-олмон маданий жамияти билан ҳамкорликда фуқароларимиз учун ҳамма шароитлар яратилди. Чартер рейслар амалга оширилгунга қадар уларнинг турар жой, озиқ-овқат билан боғлиқ бўлган барча харажатлари Германияда истиқомат қилиб келаётган юртдошларимиз томонидан тўпланган эҳсонлар ҳисобидан молиялаштириб берилди", — дейди у.
Шунингдек, маълум қилинишича, ижтимоий тармоқлар орқали “Куч бирликда- коронавирусга қарши ҳамкорликда курашамиз” хайрия акцияси ҳам амалга оширилмоқда. Aкция натижасида очилган ҳисоб рақамига 1 300 евродан ортиқ пул келиб тушди. Хайрия ишлари Рамазон ойининг биринчи ўн кунлигига қадар давом этади ва тўпланган маблағлар Ўзбекистондаги эҳтиёжманд оилаларга етказиб берилади.
