XXI асрнинг энг яхши футболчиси кимлиги маълум бўлди

Дунё аҳли пандемия балоси муносабати билан "Уйда қолинг" иборасига амал қилаётган бир пайтда жаҳонга машҳур "Four Four Two" журнали ўзига хос танлов ўтказди. Бу ҳақда УзА хабар бермоқда. 

XXI асрнинг биринчи чораги – 25 йилликдаги фаолият бўйича майдонда ҳаракат қилган ва энг яхшилар бўлишга муносиб кўрилган 25 нафар футболчиларнинг рейтингида "Барселона" клуби ҳужумчиси Лионель Месси "Энг яхши футболчи" деб топилди.

Тўғри, ҳали асрнинг илк чораги якунига етмаган, бироқ журнал ўзи фаолият бошлаган 1994 йилдан майдонда ҳаракат қилган футболчиларни танловга киритган.

Рейтингнинг иккинчи поғонаси португалиялик юлдуз Криштиану Роналдуга, учинчиси эса франциялик Зинедин Зиданга насиб этган.

Тартиб бўйича қолган ўйинчилар — бразилиялик Роналдо, Роналдиньо, франциялик Тьерри Анри, испаниялик Хави, Андрес Иньеста, италиялик Паоло Мальдини, Роберто Бажо, бразилиялик Ривалдо, италиялик Фабио Каннаваро, уэльслик Райан Гиггз, бразилиялик Кака, англиялик Уэйн Руни, португалиялик Луиш Фигу, аргентиналик Габриэль Батистута, франциялик Эрик Кантона, хорватиялик Лука Модрич, испаниялик Серхио Бускетс, Рауль, англиялик Пол Скоулз, бразилиялик Ромарио, испаниялик Серхио Рамос ва италиялик Жанлуижи Буффон.