24 апрель куни дунёнинг етакчи давлатлари раҳбарлари видеоконференция ўтказиб, CОVID-19 га қарши тестлар, дорилар ва вакциналар бўйича ишларни жадаллаштиришга ва уларни бутун дунё бўйлаб тарқатишга ваъда беришди. Бу ҳақда Reuters агентлигига асосланиб, "Таржумон.уз" сайти хабар берди.
Қайд этилишича, ЖССТ ташаббуси билан ўтказилган ушбу конференцияда Франция президенти Эммануэль Макрон, Германия канцлери Ангела Меркель ва ЖАР президенти Сирил Рамафоса кабилар қатнашиб, пандемияга қарши курашда "муҳим ҳамкорлик"ни муҳокама қилишган.
Виртуал учрашувда ЖССТ Бош директори Тедрос Адҳаном Гебрейес: "Биз барча учун умумий бўлган муаммога дуч келмоқдамиз, уни фақат умумий ёндашув билан енгишимиз мумкин. Тажриба шуни кўрсатадики, ҳамма давлатларнинг имконияти бир хил эмас. Биз барчага ёрдам берамиз", деб айтган.
Франция Президенти Эммануэль Макрон G7 ва G20 мамлакатларининг барчасини ушбу ташаббусни қўллаб-қувватлашга чақирган ва: "Биз ушбу ташаббус туфайли Хитой билан ҳам, АҚШ билан ҳам ярашиб оламиз. Чунки CОVID-19 га қарши кураш барча учун умумийдир. Бу курашда ғалаба қозониш учун ҳеч қандай бўлиниш бўлмаслиги керак", деган.
Маълумотга кўра, CОVID-19 га қарши 100 дан ортиқ вакциналар ишлаб чиқилмоқда. Уларнинг 6 таси аллақачон синовлардан ўтказилмоқда.
