Италия маданият ва туризм вазири Дарио Франческини "La Repubblica" нашрига берган интервьюсида мамлакатдаги Колизей ва Помпей каби археологик ёдгорликлар ҳамда музейлар шу йилнинг май ойида очилишини айтди.
Вазирнинг сўзларига кўра, музей ва ёдгорликлар мамлакатда карантин якунланадиган 4 майдан эмас, балки сал кейинроқ қайта ишга тушади, айни вақтда барча хавфсизлик чораларини таъминлай олган муассасаларгагина ишлашига рухсат берилади.
Вазирнинг таъкидлашича, чегараларни очиш ҳақида гапиришга ҳали эрта. Шу боис Италия расмийлари эътиборни ички туризмга қаратишга қарор қилган. Ҳукумат кам даромадли оилалар мамлакат курортларида ҳордиқ чиқара олиши учун уларга пул ажратмоқчи. Ҳар бир оилага 500 евродан ёки ҳар бир кишига бундан камроқ сумма ажратилиши мумкин.
Сўнгги маълумотларда Италияда 25 апрель куни 192 минг кишида коронавирус аниқлангани, улардан 25 минг нафари вафот этгани, яна 60 минг киши эса касалликдан соғайгани қайд этилган.
