Бугун АОКА анжуманлар залида таълим соҳасига оид энг сўнгги янгиликлар юзасидан онлайн-брифинг бўлиб ўтди. Унда Давлат тест маркази директори Мажид Каримов муҳим саволларга жавоб қайтарди. "Халқ сўзи" нашри ушбу савол-жавобларни келтирди.
— Бу йил ОТМга тест синовлари муддатлари ўзгардими?
— Йўқ. Кириш тест синовлари июль-август ойларида ўтказилиши белгиланган. Тест синови ўтказиладиган бинолар ҳудудида санитария-гигиена талабларига қатъий риоя қилинади.
— Бу йилдан тест синовлари 5 та фандан ўтказилиши эълон қилинган эди, карантин муносабати билан ўзгартиришлар борми?
— Тест синовларини соддалаштириш бўйича таклифлар кўриб чиқилмоқда. Бу масалада қабул қилинган қарорлар тез кунларда Давлат тест марказининг сайтида ва оммавий ахборот воситаларда ҳам эълон қилинади.
— Бу йили абитуриентларни рўйхатдан ўтказиш жараёни қандай бўлади?
— Бу борада ушбу тартиблар кўриб чиқилмоқда:
- рўйхатга олишда киритиладиган маълумотларни камайтириш;
- абитуриентларни рўйхатдан ўтказишни Давлат хизматлари марказлари;
- Ягона интерактив давлат хизматлари портали, Давлат тест марказининг расмий веб-сайти орқали онлайн режимда амалга ошириш;
- абитуриентга уйидан чиқмаган ҳолда мобил телефон (компьютер) ёрдамида рўйхатдан ўтиш имкониятини яратиш.
— Ҳарбий тавсияномалардан бу йил ҳам фойдаланса бўладими?
— Тавсияномалар улар берилган санадан бошлаб, уч йил мобайнида амал қилади.
— Тест топшириқлари қандай соддалаштирилади?
— Ҳар бир вариантда қўлланиладиган биринчи қийинлик даражасидаги тест топшириқлари сони ўртача 10 тагача етказилмоқда.
