Оҳангаронда қўшнилар ҳушёрлиги сабаб, икки кундан буён ўз уйида хушсиз ётган фуқаро ҳаёти сақлаб қолинди. Бу ҳақда Тошкент вилояти Ахборот хизмати хабар берди. Хўш, аслида воқеа қандай бўлган?
Жорий йилнинг 4 май куни Оҳангарон шаҳар, Навбаҳор маҳалласи, 3-кичик туман, 12-уй фуқаролари шаҳар Фавқулодда вазиятлар бошқармаси ёнғин-қутқарув қисмига кўнғироқ қилиб, уйнинг 4-хонадонида истиқомат қилувчи, 1944 йилда туғилган фуқаро Букарьёва Лидия Геннадьевна икки кун давомида кўринмай қолганлиги, эшиги ёпиқ эканлиги, қўшниларига ҳам очмаётганлиги тўғрисида хабар бердилар.
Айтилган манзилга 6 нафар қутқарувчи зудлик билан етиб бориб, фуқаро Л.Г.Букарьёва яшаш хонадонинг кириш эшигини махсус асбоб-анжомлар ёрдамида очишга муваффақ бўлишади. Фуқаро Л.Г.Букарьёва эса хонадон меҳмонхонасида ҳушсиз ҳолда топилади. Хонадон эгасига тезликда биринчи тиббий ёрдам кўрсатилганда, у ўзига келади.
Тошкент вилояти ҳокимлиги Ахборот хизматининг хабарига кўра, тез тиббий ёрдам машинасида фуқаро Л.Г.Букарьёва шифохонага олиб кетилади. Оҳангарон шаҳар Фавқулодда вазиятлар бошқармаси, тез-тиббий ёрдам хизмати ҳамда шифокорларнинг саъй-ҳаракати билан ҳозир фуқаро Л.Г.Букарьёванинг аҳволи яхши, шифокорлар назоратида.
