Американинг (Техас штати) Остин шаҳрида қўнаётган самолёт аэропортнинг учиш-қўниш йўлагида одамни уриб кетди. Бу ҳақда хабар.уз ёзмоқда.
«Остин Бергстром халқаро аэропорти кечқурун 17R учиш-қўниш йўлагида қўнаётган самолёт одамни уриб кетганидан ва унинг ҳалок бўлганидан хабардор», — дея маълум қилди аэропорт «Twitter»да.
Кейинги баёнотга кўра, «Southwest Airlines» авиакомпаниясига қарашли самолёт учувчиси учиш-қўниш йўлагида бегона одамни пайқаган ва бу ҳақда диспетчерни огоҳлантирган. Шундан сўнг аэропорт вакиллари воқеа жойига етиб боришган. Лекин кеч бўлганди. Улар учиш-қўниш йўлагида ҳодиса қурбонига дуч келишган. Аэропортга етиб келган қутқарув хизмати ходимлари эркакнинг вафот этганини аниқлашган.
Ҳалокат оқибатида учиш-қўниш йўлаги ёпилган. Аммо тез орада иш тартиби тикланиши зарур, дейилади аэропорт хабарида. Текширув ишлари Остин полицияси томонидан олиб борилмоқда.
