Бугунги вазиятда барчамизга осон эмас албатта, лекин оиланинг моддий таъминоти бўлмаса, бу фарзандлар учун катта қийинчилик? демакдир.
Мажбурий ижро бюросининг Нурота туман бўлими иш юритувида фуқаролик ишлари бўйича Навбахор туманлараро судининг 17.06.2015 йилги ижро ҳужжатига асосан, қарздор Б.Ш.дан ундирувчи Ф.Т. фойдасига 3 нафар вояга етмаган фарзандининг моддий таминоти учун қарздорнинг ҳар ойлик иш ҳақи ёки бошқа даромадларининг ½ қисми миқдорида алимент ундириш билан боғлиқ ижро ҳужжати мавжуд бўлиб, мазкур ижро ҳужжати бўлим иш юритувига 01.03.2018 йилда келиб тушган.
Анча муддат ўтишига қарамасдан қарздор Б.Ш. алимент пулларини тўлашдан бўйин товлаб, моддий ёрдамга муҳтож фарзандларини ўйламаганлиги оқибатида 12.371.493 сўм алимент қарздорлиги вужудга келган.
Қарздор алимент пулларини тўламаганлиги сабабли, Нурота туман маъмурий судининг қарорига асосан МЖтКнинг 474-моддаси 1-қисми билан айбдор деб топилиб, унга нисбатан 15 суткалик маъмурий қамоқ жазоси тайинланган.
Маъмурий қамоқ жазосини ўтаб чиққанидан сўнг, қарздор Б.Ш. тумандаги хусусий корхоналардан бирида ишчи бўлиб ишлаётгани аниқланган ва унинг иш жойига бажарилиши мажбурий бўлган талабнома юборилган.
Бўлим давлат ижрочисининг саъй-ҳаракати билан қарздордан жами 12.371.493 сўм алимент пуллари тўлиқ ундирилиб, ундирувчи Ф.Т.нинг банк пластик картасига ўтказиб берилган.
