“Uzbekistan Airports” АЖ мамлакатимиз аэропортларини ривожлантириш стратегиясини ишлаб чиқмоқда.
Маълум қилинишича, Жаҳон банки, Германия ва Россия компаниялари экспертлари иштирокида “Тошкент” халқаро аэропортини модернизация қилиш бўйича тайёрланган қўшма келишувда амалда йилига 4 миллион йўловчига хизмат кўрсатилаётган бўлса, лойиҳа тўла ишга тушгач, бу рақам 7 миллион кишига етиши мақсад қилинган.
Янгидан барпо этилаётган Самарқанд халқаро аэропортининг йўловчи терминали ва аэровокзал мажмуасидаги иншоотлар фойдаланишга топширилса, аэропорт бир вақтнинг ўзида 6 та ҳаво кемасига ва 1,5 минг фуқарога хизмат кўрсатиши мумкинлиги айтилмоқда.
Навоий аэропорти билан ҳамкорлик қилаётган чет эллик авиакомпаниялар, халқаро экспорт ташкилотларининг сони кун сайин ортиб бормоқда.
Урганч, Андижон, Қарши, Нукус халқаро аэропортларида давлат-хусусий шериклик асосида инвесторларни кенг жалб этиш масалалари давлат Дастури асосида ривожлантириляпти.
