Нидерландиядан иккита юк вагонида Ўзбекистонга 64 бош қорамол жўнатилди. Чорва моллари етти кун давомида Ўзбекистонга етиб келади, деб ёзади "Янги Ўзбекистон" нашри.
Чорва моллари Нидерландиянинг “Ван дер Плуг Интернэшнл” компанияси томонидан юборилган бўлиб, Наманган вилоятида ташкил этиладиган йирик сут фермаси учун мўлжалланган.
Ўзбекистоннинг Бенилюкс мамлакатларидаги элчиси Дилёр Ҳакимов Нидерландия компанияси раҳбари Альберт Ван дер Плуг билан учрашди ва ўзбекистонлик шериклар билан ҳамкорликни кенгайтириш масалаларини муҳокама қилди.
Хабар берилишича, нидерландиялик тадбиркор Ўзбекистон бозорида 25 йилдан буён фаолият юритиб келади. Кейинги ҳафта яна бир неча юзта қорамол жўнатиш кўзда тутилган. Шунингдек, зотдор қорамолларни Жиззах, Самарқанд, Тошкент, Бухоро ва Андижон вилоятларига ҳам етказиб бериш режалаштирилган.
